SF Peduli

Banjiiiiiirrrrr.....

Aah….! Nya’ banjir!

Jakarta kebanjiran, di Bogor angin ngamuk

Ruméh ané kebakaran, garé-garé kompor mledug

Ané jadi gemeteran, wara-wiri keserimpet

Rumah ané kebanjiran, gara-gara got mampet

Aa~ti-ati kompor meledug, Aa~ti ané jadi dag-dig-dug (heh.. jatuh duduk)

Aa~yo-ayo bersihin got, Jaa~ngan takut badan blépot
Coba enéng jangan ribut, jangan padé kalang kabut

(“Kompor Mledug”, Benyamin S)

Jakarta banjir gedé lagi. Banjir nyang sebenernyé udah pernah kejadian waktu jaman Hindia Belanda malah juga udah adé waktu pemeréntahan Purnawarman th 417M (kecatet di “Prasasti Tugu”). Di prasasti tadi diceritain beberapa sungai digali dan “disodét” lantaran buat nanggulangin banjir (salah satunyé Kalimalang).

Th 1800-an pemeréntah Hindia Belanda bikin konsep malah sampé bikin kantor khusus buat nanggulangin banjir, naményé Burgelijke Openbare Werken (BOW jadi cikal bakal Kementerian Pekerjaan Umum). Tapi kenyataannyé th 1873, Jakarta (Batavia waktu itu) masih jugé kebanjiran. Banjir lumayan gedé th 1918 makan banyak banget korban jiwa. Kalo kagak salah th 1920-an ditunjuk Prof. Herman van Breen buat bikin konsep nyegah banjir trus dibikin dah Kanal Banjir Barat mulai daerah Manggarai, Kali Cideng, Kali Krukut, Kali Grogol sampé Muara Angke (“Merdeka.Com’). Konsep Kanal Banjir tadi sampé sekarang masih dipaké dan dikenal amé sebutan “Konsep van Breen”.

                                                          (bader amat nih bocah, minta dicengkéwéng)

Januari 2013 Jakarta banjir lagi. Kagak cuman daerah pinggiran kali, tapi juga ngelébar ke tengah kota. Bunderan HI, Balé Kota Jakarta sampé Istana Presiden ikut kerendem. Katényé “Banjir Lima Taunan”, kok bisa kejadian terus ya? Hadeuuuhhh ampeg dah...

 

Tahun ini banyak orang nyang rumahnyé jauhan dari kali ikut kerendem. Bisa dibayangin gimané nyang atepnyé deket banget di samping kali. Bukan cuman kerendem tapi kelelep. Ngelihat musibah ini, Pak Titut ngelontarin ajakan buat ikut ngebantu ngeringanin beban sodara-sodara nyang kena banjir............tuh ajakan langsung ditegrep amé temen-temen di SF. 

“Cletang-cletung” di grup makin ramé....

Satu - satu mulai bikin catetan barang apé ajé nyang mau disumbangin. Adé nyang nyumbang duit, adé nyang udah ngumpulin pakaian bekas layak paké, adé nyang beli makanan instan, pembalut buat perempuan, “diaper” buat bocah, sabun anti septik, obat-obatan, buku tulis, dll. Rencananyé barang-barang tadi mo dikumpulin hari Minggu 20 Januari 2013, tapi dirasain masih kurang. Akhirnyé Minggu soré abis aqiqahnyé Fei (atau Feiy, atau Feii ye? Pokoknyé anaknyé Surip ama Rika dah), duit nyang udah kekumpul dibeliin barang-barang lagi. Ada air minum kemasan,  sembako, biskuit, tiker, makanan instan, dll. Abis beli-beli, perut kerasa “kruwek-kruwek-kongkorongok” minta diisi (akhirnyé makan seafood....huaaaaaaa). 

Ngobrol rerembugan sembari makan, akhirnyé disepakatin bantuan mau diserahin tgl 24 Januari 2013 sebab adé berita di media massa kalo banjir lebih gedé lagi bakalan bikin Jakarta kelelep tgl 27, 28 & 29 Januari 2013), tapi belom adé kesepakatan daerah mané nyang mau dituju.

Ode (orang paling “kecil” setelah Oom John...hihihi) berusaha ngumpulin info dari posko banjir nyang kesebar. Dapet info kalo masih adé tempat-tempat nyang masih belom dapet cukup bantuan kayé daerah Kapuk, Tambun & Karawang Barat.

Kemis pagi, 24 Januari 2013

Temen-temen SF udah pada dateng di rumah Pak Titut. Barang-barang nyang mau disumbangin lagi didata. Alhamdulillah lumayan banyak banget tambahannyé. Sumbangan duit juga makin banyak kekumpul, tapi daerah penyaluran masih belom disepakatin...

Sambil nyruput kupi item rembugan dimulai lagi buat nentuin daerah penyaluran sambil ngumpulin informasi dari pos-pos bantuan buat korban banjir. Setelah ditimbang-timbang, akhirnyé disepakatin bantuan bakal diserahin ke Posko Banjir PMI Wilayah Jakarta Barat buat didistribusiin ke daerah-daerah nyang masih merluin bantuan, karena kalo kité sendiri nyang nyalurin, kuatir kagak tepat sasaran. Barang-barang bantuan langsung dimasukkin ke dalem mobil box sambil didata ulang.

(bantuan nyang mo disalurin, kagak termasuk abang-abangnyé)

Setelah semuanyé dimasukkin, rombongan siap-siap berengket. 

Konvoi 4 mobil + 1 mobil box ke PMI Wilayah Jakarta Barat di daerah Petamburan mulai begerak kira-kira jam 10 lewat kalo kagak salah (mohon dimaapin kalo salah J).

  

Untungnyé jalanan Jakarta tuh hari kagak macet, boleh dibilang lancar banget, jadi kagak buang waktu banyak buat nyampé di Petamburan. Waktu masuk pekarangan kantor PMI, langsung disambut pemandangan khas persiapan nanggulangin korban banjir.

Perahu karet, ambulan ama satu kendaraan amfibi (Hagglunds BV206 bikinan Swedia) rodanyé paké ranté mirip dozer beténggér di parkiran.

     (ini bedua lagi  pada ngapain?)

Abis disambut dengan sangat baik dan ngenalin diri, rombongan kité langsung diajakin masuk ke dalem kantor PMI. Di dalem dijelasin ama orang PMI (maap ané lupa naményé bang) soal daerah-daerah mané ajé nyang masih butuh disalurin bantuan.

Bantuan dari temen-temen SF diserahin secara simbolis ke PMI buat disalurin ke sodara-sodara nyang lagi kena musibah banjir.

Abis itu, barang-barang bantuan mulai diturunin dari mobil box. Gotong-royong ngangkutin ke dalem kantor PMI.

 

Ngobrol-ngobrol bentaran ama bapak-bapak PMI, sekitar jam 2-an siang rombongan pamit pulang ke rumah Pak Titut.

Mudah-mudahan bantuan nyang kité kasih bisa ikut ngeringanin sodara-sodara kité nyang lagi kesusahan.

Semoga Allah SWT ngebales segala bantuan dari temen-temen di SF ama balesan nyang belipat ganda. Aamiin.

...dan semoga juga kité bisa ngambil pelajaran dari musibah nyang udah kejadian. Nyang penting adalah ngebetulin persiapan buat nyegah sebelom kejadian bukan cuma ngebetulin nyang rusak setelah kejadian.

(poto-poto diambil dari koleksi pribadi amé beberapa sumber)

Rawe Belong, Sun 03rd Jan 2013

11.00 pm

dd